విద్యుత్‌ శాఖలో ఉన్నతాధికారి సస్పెన్షన్‌.. సీఎం ఆదేశాలతో చర్యలు

తెలంగాణలో విద్యుత్‌ కోతలపై ముఖ్యమంత్రి రేవంత్‌రెడ్డి ఆగ్రహం వ్యక్తం చేసిన నేపథ్యంలో ప్రభుత్వం చర్యలు చేపట్టింది. విధుల్లో నిర్లక్ష్యంగా వ్యవహరించారనే ఆరోపణలతో యాదాద్రి థర్మల్‌ పవర్‌ స్టేషన్‌ (వైటీపీఎస్‌) స్టేజ్‌-1 చీఫ్‌ ఇంజినీర్‌ బి. సురేశ్‌ను సస్పెండ్‌ చేసింది. టీజీ జెన్‌కో సీఎండీ ఎస్‌. హరీశ్‌ ఈ మేరకు ఉత్తర్వులు జారీ చేశారు. విద్యుదుత్పత్తి పెంపునకు అవసరమైన పనుల ప్రణాళిక, పర్యవేక్షణ, అమలులో నిర్లక్ష్యం ప్రదర్శించారని ఉత్తర్వుల్లో పేర్కొన్నారు. శాఖాపరమైన విచారణ పూర్తయ్యే వరకు సస్పెన్షన్‌ కొనసాగనుంది.

ఉన్నతాధికారులతో నిర్వహించిన సమీక్షలో యాదాద్రి థర్మల్‌ పవర్‌ స్టేషన్‌ పూర్తి సామర్థ్యంతో విద్యుత్‌ ఉత్పత్తి చేయకపోవడంపై సీఎం రేవంత్‌రెడ్డి అసంతృప్తి వ్యక్తం చేశారు. నైనీ, మహానది బొగ్గు బ్లాకుల నుంచి సరఫరా ఉన్నప్పటికీ ఉత్పత్తి ఎందుకు పెరగడం లేదని ప్రశ్నించారు. విధుల్లో నిర్లక్ష్యం వహిస్తే ఉన్నతాధికారులపైనా చర్యలు తీసుకుంటామని హెచ్చరించారు. రాష్ట్రంలో లోటు వర్షపాతం, ఎల్‌నినో ప్రభావం, విద్యుత్‌, తాగునీటి సరఫరా పరిస్థితులపైనా సమీక్షించారు.

వ్యవసాయానికి నిరంతర విద్యుత్‌ సరఫరా చేయాలని, పంట చేతికొచ్చే వరకు కోతలు లేకుండా చూడాలని సీఎం అధికారులను ఆదేశించారు. రానున్న 20 రోజులు పంటలకు కీలకమని, విద్యుత్‌ కొరతతో రైతులు నష్టపోయే పరిస్థితి రాకూడదని స్పష్టం చేశారు. వ్యవసాయ విద్యుత్‌ డిమాండ్‌ అధికంగా ఉన్న ప్రాంతాలను గుర్తించి సరఫరాను మెరుగుపర్చాలని సూచించారు. ప్రజలకు ఇబ్బందులు కలిగించే నిర్లక్ష్యాన్ని సహించబోనని, ప్రజలకు తాను జవాబుదారీగా ఉన్నానని రేవంత్‌రెడ్డి స్పష్టం చేశారు.

ఇదీ చదవండి :: జిమ్ తర్వాత ఖరీదైన ప్రొటీన్ పౌడర్లు అవసరం లేదు.. ఇవే బెస్ట్ ఫుడ్స్!